هەوڵی دوورخستنەوەی گەریلاكانی پەكەكە لە ناوچە سنوورییەكانی شارباژێڕ دەدرێت هەوڵی دوورخستنەوەی گەریلاكانی پەكەكە لە ناوچە سنوورییەكانی شارباژێڕ دەدرێت هەوڵی دوورخستنەوەی گەریلاكانی پەكەكە لە ناوچە سنوورییەكانی شارباژێڕ دەدرێت

هەوڵی دوورخستنەوەی گەریلاكانی پەكەكە لە ناوچە سنوورییەكانی شارباژێڕ دەدرێت

هەوڵی دوورخستنەوەی گەریلاكانی پەكەكە لە ناوچە سنوورییەكانی شارباژێڕ دەدرێت


سلێمانی- نزار جەزا
بەپێی زانیارییەكانی گەیشتوو بە (خەڵك)، هاووڵاتیانی ناوچە سنوورییەكانی شارباژێڕ لەگەڵ بەرپرسانی پەكەكە لە سنوورەكە لەگفتووگۆدان، بە ئامانجی دوورخستنەوەی بنكە و بارەگاكانی پەكەكە لەو ناوچانەی لە شوێنی نیشتەجێبوونی هاووڵاتیانەوە نزیكن، یان كەمكردنەوەی بارەگا و ژمارەی گەریلاكان لە سنوورەكەدا.

پاشئەوەی گوندی گەڵاڵە بەهۆی بۆردومانی فڕۆكەكانی توركیاوە چۆڵكرا، حكومەتی هەرێم و لایەنە سیاسییەكانی باشووری كوردستان، تاكو ئێستا بەڕوونی هەڵوێستیان نەبووە و هیچ هۆشدارییەكیان بە وڵاتی توركیا نەداوە، هاوكات دانیشتوانی ئەو گوندەش لەهەوڵدان بۆ دوورخستنەوەی پەكەكە لە چیای ئاسۆس.

بەپێی زانیارییە گەیشتووەكان بە(خەڵك)، لەئێستادا ژمارەی گەریلاكانی پەكەكە بەتەواوی لەسنوری چیای ئاسۆس و دەوروبەری گوندی گەڵاڵە كەمبونەتەوە.

بەوتەی دانیشتویەكی گوندی گەڵاڵەی سەر بەقەزای ماوەت لەناوچەی شارباژێڕ، كە نەیویست ناوی بهێنرێت، حكومەتی هەرێم هیچ هەڵوێستێكی دیاری بەرامبەر وڵاتی توركیا نەبووە، بۆیە ناچارن بۆ پاراستنی گیانی خۆیان و دووبارە ئاوەدانبوونەوەی گوندەكەیان داوا لەپەكەكە بكەن، بەتەواوی لەچیای ئاسۆس دووربكەونەوە، بۆ ئەوەی گیانی گوندنشینەكان سەلامەت بێت، بۆ ئەم مەبەستەش چەند جارێك لەگەڵیان دانیشتوون بەڵام ئەنجامێكی ڕوونی نەبووە.

عوسمان رەسوڵ، كە خەڵكی گوندی گەڵاڵەیە و پاش بۆردومانی فڕۆكەكانی توركیا گوندەكەی جێ هێشتووە، بۆ (خەڵك)ی باسی لەوەكرد، پێشتر نزیك بە 60 ماڵ لەگوندی گەڵاڵە هەبوون‌و قوتابخانە و نەخۆشخانەكەیان دەوامی تێدا دەكرا، بەڵام بەداخەوە لەئێستادا گوندی گەڵاڵە تەنها 14 ماڵی تێدایە و تاكو ئێستاش قوتابخانەكە نەكراوەتەوە.

ئەو هاوڵاتییە، باسی لەوەشكرد، خەڵكی لادێكە لە بۆردومانی فڕۆكەكان ترساون، بۆیە ناتوانن بگەڕێنەوە ناو گوندەكە، بەڵام پێدەچێت تاكو بەهار ماڵی دیكەش بگەڕێنەوە بۆ ناو گوندەكە.

ئەوەشی خستەڕوو، پێشتر كۆمەڵێك ڕێكخراوی وەك خاجی سوری نێودەوڵەتی سەرژمێرییان كردن، بەمەبەستی هاوكاریكردنیان، بەڵام تاكو ئێستا هیچ هەڵوێستێكیان نەبووە، لەكاتێكدا زۆرێك لەو ماڵانەی گوندەكەیان چۆڵكردووە، ئێستا لەناو شار لەخانووی كرێ یان خانووی تەواونەكراودا ژیان بەسەردەبەن.

لەكۆتایی ساڵی ڕابردوودا پێنج جار فڕۆكە جەنگییەكانی وڵاتی توركیا بەبیانوی بوونی گەریلاكانی پەكەكە بۆردومانی چیای ئاسۆس و دەوروبەری گوندی گەڵاڵەیان كرد، بەڵام ماوەی مانگێك زیاترە بۆردومانەكان وەستاون.

كامەران حەسەن  قائیمقامی قەزای ماوەت سەبارەت بەبوونی ڕێككەوتن لەنێوان وڵاتی توركیا بۆئەوەی بۆردومانەكانی ڕابگرێت، بە (خەڵك)ی ڕاگەیاند، ئەگەر هەر ڕێكەوتنێك كرابێت، ئەوە پەیوەندی بەلایەنی سیاسییەوە هەیە، بەڵام وەك لایەنی حكومی نە ئاگادارن و نە ئاگاداركراونەتەوە لەبونی هەر ڕێكەوتنێك.

ناوبراو ئەوەشی وت:" زیاتر لەمانگێكە دۆخەكە ئاسایی بۆتەوە، بۆیە نزیكی 17 ماڵ گەڕاونەتەوە و هەندێك ماڵی دیكەش بەهۆی ئەوەی خوێندكارەكانیان گواستۆتەوە بۆ ناو شار و لێرەش تاكو ئێستا قوتابخانەكە نەكراوەتەوە، بۆیە زەحمەتە بگەڕێنەوە، بەڵام بڕیارە لەم هەفتەیەدا قوتابخانەكەش بكرێتەوە".


لەماوەی ڕابردوودا لیژنەیەكی ئەنجومەنی پارێزگای سلێمانی سەردانی گوندی گەڵاڵەیان كرد و لەگەڵ بەرپرسانی حكومی ئەو ناوچەیە كۆبونەوە، لەم بارەیەوە ئازاد محەمەد، سەرۆكی ئەنجومەنی پارێزگای سلێمانی، بە(خەڵك)ی ڕاگەیاند، لەڕێگەی پەیوەندییەكانیانەوە توانیویانە كۆمەڵێك بەڵێن وەربگرن بۆئەوەی هۆكارەكانی بۆردومانكردنی ئەو گوندە نەمێنن.

ئەوەشی خستەڕوو، لەدوای ئەم سەردانانەوە هیچ بۆردومانێك ڕووینەداوە، بەڵام ئەمە ناگاتە ئەوەی گرەنتی بدەن، كە بۆردومانی دیكە ڕووناداتەوە، بەڵام لەهۆكاری بۆردومانەكان تێگەیشتن و كاردەكەن بۆ دوورخستنەوەی هۆكاری  بۆردومانەكان و كەمیشكراوەتەوە.

ساڵانێكە سنورەكانی هەرێمی كوردستان كەوتۆتە بەر بۆردومانی فڕۆكە جەنگییەكانی وڵاتانی دراوسێ، ئەمەش بۆتە هۆی كوژران و برینداربونی دەیان كەس و سوتان و لەناوچونی دەیان دۆنم زەوی، بەڵام تاكو ئێستا حكومەتی هەرێم و لایەنە سیاسییەكان بەرامبەر هیچ وڵاتێك نەیانتوانیوە هەڵوێستیان هەبێت و ئەو هێرشانە ڕابرگرن. 

11/01/2018
587 جار بینراوە‌‌
11/01/2018
574 جار بینراوە‌‌
11/01/2018
587 جار بینراوە‌‌


Developed by Avesta Group and powered by Microsoft Azure

Copyright © 2016 Xelk. all rights reserved