لەسەر سكاڵای پێشمەرگە، نەخۆشخانەیەك لە توركیا داخرا

لەسەر سكاڵای پێشمەرگە، نەخۆشخانەیەك لە توركیا داخرا

لەسەر سكاڵای پێشمەرگە، نەخۆشخانەیەك لە توركیا داخرا

سلێمانی- نزار جەزا

سێ ساڵ بەسەر دەرهێنانی گورچیلەی پێشمەرگەیەك لەنەخۆشخانەیەكی وڵاتی توركیا تێدەپەڕێت، لەئێستاشدا بەڕێوەبەری گشتی دەزگای تەندروستی پێشمەرگە ئاشكرای دەكات، لەسەر سكاڵای وەزارەتی پێشمەرگە ئەو نەخۆشخانەیەی وڵاتی توركیا داخرا.

بەختیار جەبار، كە لەدایكبووی ساڵی 1984ە و پێشمەرگەبوو لە لیوای یەكی پاراستنی سلێمانی، لە 13-3-2015 لەتەللوەرد بەهۆی تەقینەوەیەكەوە بەسەختی برینداربوو، لیژنەی پزیشكی بڕیاریدا بینێرن بۆ ئەڵمانیا، بەڵام لەهەولێر لەوەزارەتی پێشمەرگە وڵاتی ئەڵمانیایان گۆڕی بۆ توركیا و ئەوان نەخۆشخانەیەكیان لەتوركیا بۆ دیاریكرد، بۆیە لە 7-5-2015 ناردیان بۆ نەخۆشخانەیەك لەتوركیا.

لەماوەی هەفتەیەكدا لەتوركیا شەش نەشتەرگەری بۆ ئەنجامدرا، بەڵام بەوتەی ئەو پێشمەرگەیە: "لەو نەشتەرگەرییانەدا گورچیلەیەكیان دەرهێنا بەبێ ئەوەی هیچ كێشەیەكی هەبێت و بەبێ ئەوەی پرسی پێبكەن، چونكە پێشئەوەی بچێت بۆ توركیا لەسلێمانی پشكنینی كردووە و گورچیلەی راست و چەپی وەك یەك ئیشیان دەكرد و كێشەی نەبووە".

بەوتەی پێشمەرگەكە، لەگەڵ ئەوەی گورچیلەی دەرهێندراوە و لەفاف لەشوێنی بەجێهێڵدراوە، شادەماری قاچی راستیان بڕی، ئەمەش گرفتی دروستكردووە.

شەماڵ جەبار یاوەر بەڕێوەبەری گشتی دەزگای تەندروستی پێشمەرگە بۆ (خەڵك)ی ڕوونكردەوە، ئەو پێشمەرگەیە بۆ چارەسەری پێویست نێردرابووە وڵاتی توركیا، بەڵام لەوێ بەبێ ئاگاداری خۆی گورچیلەیان بۆ دەرهێنابوو.

ئاماژەی بەوەشدا، پاشئەوەی دەركەوت سكاڵای پێشمەرگەكە ڕەوایە و ماف لای ئەوە، بەڕەسمی لەڕێی وەزارەتی پێشمەرگەوە سكاڵا لەسەر ئەو نەخۆشخانەیەی وڵاتی توركیا تۆماركرا.

ئاشكراشیكرد، ئەنجامی سكاڵاكەیان سەركەوتووبوو و ئەو نەخۆشخانەیە لەوڵاتی توركیا داخرا.

لەئێستاشدا بەوتەی بەڕێوەبەری گشتی دەزگای تەندروستی پێشمەرگە، هیچ قەرەبویەكی ئەو پێشمەرگەیە نەكراوەتەوە و ڕۆشتووە بۆ وڵاتی ئەڵمانیا.

بەپێی ئامارێكی دەزگای تەندروستی پێشمەرگە، هەزار و 216 برینداری شەڕی داعش پێویستیان بەناردنە دەرەوە هەبوو، لەو ژمارەیەش نزیكی هەزار كەسیان ناردۆتە دەرەوە.

لە10ی حوزەیرانی ساڵی 2014و دەستپێكردنی شەڕی داعشەوە، هەزار و 824 پێشمەرگە شەهید و زیاتر لە 10  هەزار پێشمەرگەی دیكەش برینداربوون و ژمارەیەكیش بێ سەروشوێن بوون.

پێش 1 هەفتە
1054 جار بینراوە‌‌


Developed by Avesta Group and powered by Microsoft Azure

Copyright © 2016 Xelk. all rights reserved