عەدنانی حەمەی مینا: تا ئێستا بەرهەم ساڵح یەكێتییە

عەدنانی حەمەی مینا: تا ئێستا بەرهەم ساڵح یەكێتییە

عەدنانی حەمەی مینا: تا ئێستا بەرهەم ساڵح یەكێتییە

خەڵك ـ فەرهەنگ فەرەیدون

عەدنانی حەمەی مینا، ئەندامی ئەنجومەنی سەركردایەتی یەكێتی نیشتمانی كوردستان رایدەگەیەنێت، هێشتا ئەو ئەندامێكی ئەنجومەنی سەركردایەتی یەكێتی نیشتمانی كوردستانەو ئاماژەی بەوەشكرد، كە شانازی بە هاوڕێیەتی بەرهەم ساڵحەوە دەكات.

عەدنانی حەمەی مینا، لە چاوپێكەوتنێكی تایبەت لەگەڵ (خەڵك) رایگەیاند، كە هێشتا ئەندامی ئەنجومەنی سەركردایەتی یەكێتییە و هەركاتێكیش لەو حزبە نەما ئاشكرای دەكات.
سەبارەت بە پەیوەندییەكانی نێوان خۆی و بەرهەم ساڵح دەڵێت " كاك بەرهەم هاوڕێمە، لە یەكێتیشدا بەرپرسم بووە، شانازیش بە هاوڕێیەتی كاك بەرهەمەوە دەكەم، لە یەكێتی بێت یان لە دەرەوەی یەكێتی".

دەقی چاوپێكەوتنەكە:

خەڵك: لە دواین كۆبوونەوەی ئەنجومەنی سەركردایەتی یەكێتی نیشتمانی كوردستان پڕۆژەیەك پێشكەشكرا، دوای ئەو كۆبوونەوەیەش هەندێك لە ئەندامانی سەركردایەتی یەكێتی باسیان لەوەكرد مەكتەبی سیاسی هەڵوەشاوەتەوە، هەندێكی دیكەش دەڵێن مەكتەبی سیاسی هەڵنەوەشاوەتەوە، بەڕێزتان دەڵێن چی لەو بارەیەوە؟

عەدنانی حەمەی مینا: لەپێش ریفراندۆم ئەنجومەنی سەركردایەتی یەكێتی بڕیاریدا دوو لیژنە دروست بكات، یەكێك لەو لیژنانە كاری ئەوەبوو كە راپۆرت پێشكەش بكات بۆ چاكسازی لەناو حكومەت، لیژنەكەی دیكە راپۆرتی  بۆ چاكسازی لەناو ئۆرگانەكانی حزب، بۆ نووسینەوەی ئەو راپۆرتەش ماوەی مانگێك درا بەو دوو لیژنەیە، بەڵام بەهۆی رووداوەكانی ریفراندۆم و 16ی ئۆكتۆبەر كۆبوونەوە و خوێندنەوەی ئەو راپۆرتانە دواكەوت.
لە راپۆرتی لیژنەی چاكسازی حزب، پێشنیاركرا دەستەیەكی 11 كەسی دابنرێت بۆ بەڕێوەبردنی یەكێتی تا ئەنجامدانی كۆنگرە، جا ئەو دەستەیە ناوی مەكتەبی سیاسی بێت یان هەر ناوێكی دیكە، ئەمەش بۆ ئەوەی چارەسەری كێشەكانی خۆمان بكەن، بەتایبەت دوای ئەوەی لە %51 خاكی كوردستانمان لەدەستدابوو نەدەكرا قسە نەكەین.

ئەم پێشنیارە خاڵی یەكەمی ئەو پڕۆژەیە بوو، خرایە دەنگدانەوە و بەزۆرینەی دەنگ پەسەندكرا، بەڵام هەندێك لە هەڤاڵان كاردانەوەیان هەبوو، بۆیە بڕیاردرا دوو رۆژ كۆبوونەوەی ئەنجومەنی سەركردایەتی دوابكەوێت، ئەوەبوو كاك كۆسرەت نەخۆش كەوت، تەنها ئەویش ئەو شەرعیەتەی هەیە بڕیار لەسەر كۆبوونەوەی سەركردایەتی یەكێتی بدات.

خەڵك: هەندێك لە ئەندامانی مەكتەبی سیاسی حزبەكەت پێیان وایە ئەم پڕۆژەیە تەنها بۆ دورخستنەوەی ئەوانە، ئامانجتان لەم پڕۆژەیە تەنها دورخستنەوەی ئەو هەڤاڵانەتانە؟
عەدنانی حەمەی مینا: ئەو هەڤاڵانەی مەكتەبی سیاسی چەند ساڵە خەبات دەكەن و ئەوان هەر ئەندامی سەركردایەتین، ئەو پڕۆژەیەش بۆ دژایەتی نییە، بەڵام بارودۆخێك هاتۆتە پێشەوە، ئەو پڕۆژەیەش تەواو حزبییە و بە دەنگدانە، ئەو برادەرانە دەتوانن جارێكی دیكە خۆیان هەڵبژێرنەوە و ئەگەر دەنگیان هێنا دووبارە دەبنەوە مەكتەبی سیاسی.

خەڵك: هیچ وادەیەك دیاری كراوە بۆ ئەنجامدانی كۆنگرە؟
عەدنانی حەمەی مینا: بۆ هەموو حزبێكی سیاسی ئەنجامدانی كۆنگرە لە كاتی دیاریكراوی خۆیدا پێویستە بۆ پێداچوونەوە بە سیاسەتەكانی حزبدا و هێنانە پێشەوەی گەنج و دانانی بەرنامەی نوێ‌ بۆ ئەوەی لەگەڵ سەردەمەكەدا بگونجێت.

یەكێتی دەبووایە لە 2013 كۆنگرەی ببەستایە، چونكە ئێمە لە كۆنگرەی پێشوو بڕیارماندا ئەگەر كۆنگرە لەكاتی خۆیدا نەكرێت، ئەوا ئەنجومەنی سەركردایەتی شەرعیەتی نامێنێت، بەداخەوە كۆنگرە نەكرا كە دەبوو بكرایە، ئەگەر كۆنگرە ببەسترایە ئەوا ئێمە توشی ئەم قەیرانانەی ئێستا نەدەبووین، هەموانیش دەزانن یەكێتی كێشەی قوڵی هەیە، كێشەی ئیدارەدان و بەڕێوەبردنی هەیە.

بۆ ئەنجامدانی كۆنگرە دەبێت ئێمە سەیری خۆمان بكەین، ئەمە بارودۆخمانە و ئێمە یەك دەنگ نین لەناو خۆماندا، كە یەكدەنگیش نەبووین لەناو كۆنگرە ئێمە زەرەر دەكەین.

چاوەڕێ‌ دەكەین ئەو دەستەیە دروست بكرێت، پاشان ئەوان بڕیاری ئەوە بدەن كەی و چۆن  كۆنگرە ببەسترێت و دەبێت بەرپرسیارێتیش لە ئەستۆ بگرن.

 كۆنگرەكە دەبێت بۆ هەستانەوەی یەكێتی نیشتمانی كوردستان بێت، ناكرێت بۆ دورخستنەوەی ئەم گروپ و ئەو گروپ بێت، دەبێت كۆنگرە یەكێتی بكاتەوە بە حیزبی رەنجدەرانی بیرو بازوی كوردستان، كە لە رابردوودا شاسواری خەباتی كوردایەتی بووە و باجێكی زۆری داوە، بەداخەوە ئێستا بەبۆنەی هەندێك سیاسەتی هەڵەوە ئاوای لێهاتووە، هاوڵاتیانیش هەندێك لە كێشەكانیان لەچاوی ئەم حزبەوە دەبینن بۆیە گرنگە یەكێتی هەستێتەوە.


خەڵك: رۆژی 17\9\2017، دەنگۆی ئەوە بڵاوكرایەوە كە  بەرهەم ساڵح، دەست لەكاركێشانەوەی پێشكەشی یەكێتی كردووە، لەم دواییانەش دەنگۆی ئەوە بڵاوكراوەتەوە كە هەوڵی گەڕانەوەی دەدەن، ئەم دەنگۆیە تا چەند راستە؟
عەدنانی حەمەی مینا: كاك بەرهەم زیاتر لە سێ‌ ساڵە دوركەوتۆتەوە لە ناوەندی بڕیاری  یەكێتی، كاك بەرهەم ناكۆكی هەبووە لە حوكمڕانی و سیاسەت و ئیدارەدانی حزب، ئەو دوركەوتەوە بۆ ئەوەی ململانێی هاوڕێكانی نەكات.

من تا ئێستا نامەی دەست لەكاركێشانەوەی كاك بەرهەمم نەدیوە، نە لە مەكتەبی سیاسی و نە لە ئەنجومەنی سەركردایەتیش ئەو نامەیە نەهێنراوەتە سەر مێزی گفتوگۆ، بۆیە كاك بەرهەم هێشتا یەكێتییە.

خەڵك: بەپێی پەیڕەوی ناوخۆ، هەركەسێك لەحزبێكی دیكە ببێتە ئەندام ئەوا ئەندامێتی هەڵدەوەشێتەوە لە یەكێتی؟
عەدنانی حەمەی مینا: كە خۆی بڕیاری دابێت ناتوانی پێی بڵێیت مەڕۆ، بەڵام كاك بەرهەم هەتاوەكو ئێستا یەكێتییە.

خەڵك: سەرەتای دروستبوونی هاوپەیمانی بۆ دیموكراسی و دادپەروەری، ناوی كۆمەڵێك سەركردە بڵاوكرایەوە كە لەگەڵ كاك بەرهەمدان، یەكێك لەو سەركردانەش بەرێزتان بوون، ئێوە هاودیدی هاوپەیمانین یاخود هەڤاڵی یەكێتی؟
عەدنانی حەمەی مینا: هەتا ئەم دەقەیەش ئەندامی ئەنجومەنی سەركردایەتی یەكێتی نیشتمانی كوردستانم.
كاك بەرهەم هاوڕێمە، لە یەكێتیشدا بەرپرسم بووە، شانازیش بە هاوڕێیەتی كاك بەرهەمەوە دەكەم، لە یەكێتی بێت یان لە دەرەوەی یەكێتی.
كاك بەرهەم پیاوێكی بەڕێز و دەوڵەتمەدار و خۆشەویستە لای خەڵك، منیش یەكێكم لەو كەسانەی شانازی پێوە دەكەم، بەڵام من ئەندامی یەكێتیم، ئەگەر بشمەوێت یەكێتی نەبم رایدەگەیەنم.

لە ئێستادا هەموو هەوڵ و توانام بۆ ئەوەیە یەكێتی بكەینەوە بە یەكێتییەكەی جاران، بە منیش و بە كاك بەرهەمیش و هەموو ئەو كاكانەی تریش، ئەو هێزانە یەكبخەین كە بەرژەوەندی دەڤەری سەوزی ئەوسا و سەوز و نیلی ئێستایان گەرەكە، بۆ ئەوەی بتوانین حكومڕانییەكی باش لەم ناوچەیە دروست بكرێت و هاوڵاتیانی خۆمان شانازی پێوە بكەن، نەك گلەیی لێبكەن.

خەڵك: لە قسەكانتدا وتت كە كاك بەرهەم هاوڕێتە، دەوترێت كاك بەرهەم تەنها پۆستی سكرتێری گشتی پێبدرێت دەبێتەوە بە یەكێتی، بەرهەم ساڵح هیچ شتێكی لەو شێوەی پێ وتووی؟
عەدنانی حەمەی مینا: كاك بەرهەم بەتەمای پۆستی سكرتێری گشتی یەكێتیی نییە و ئەو دەنگۆیە دوورە لە راستی، خۆشی دەڵێت، من لەناو یەكێتی بم یان لەدەرەوە، یەكێتی حزبێكی تێكۆشەر و خاوەن رابردوویەكی پرشنگدارە و هاوكار دەبم بۆ باشكردنی بارودۆخەكەی، بۆیە منیش و كاك بەرهەم و هەموو هەڤاڵەكانی دیكە، ئەركمانە دۆخی یەكێتی باش بكەین.

خەڵك: دەوترێ‌ یەكێتی نیشتمانی كوردستان لەگەڵ ئەنجامدانی ریفراندۆم بوو، بەڵام لەدوای رووداوەكانی 16ی ئۆكتۆبەر، یەكێتی پەنجەی تۆمەتی بۆ پارتی راكێشا،   قسەتان چییە لەم بارەیەوە؟
عەدنانی حەمەی مینا: ریفراندۆم مافی ئاسایی هەموو گەلێكە، گەلی كوردیش لە عێراق ئەم بابەتەی بە یاسایی داناوە و یاساییش بووە، بەڵام ئێمە لە ئەنجومەنی سەركردایەتی یەكێتی نیشتمانی كوردستان، بڕیارێكمان ھەبووە كە لەگەڵ ئەنجامدانی ریفراندۆم و سەربەخۆیین بەمەرجێك ئەو بابەتە لە پەرلەمانی كوردستان بە یاسایەك رێكبخرێ و بە لەبەرچاوگرتنی ھەلومەرجەكە كات و ڕۆژی گونجاوی بۆ دیاری بكرێ، دەبوایە ئێمە لە كۆبوونەوەكانمان لەگەڵ پارتی، پارتی و یەكێتی لەگەڵ لایەنەكانی دیكە، هەوڵمان بدایە بەیاسا ریفراندۆم رێكبخەین، لە پەرلەمانیش ئەندامانی فراكسیۆنی یەكێتی دەنگیان بە ئەنجامدانی ریفراندۆم دا، بۆیە یەكێتیش  دەبێت تەحەموولی ئەنجامەكانی ریفراندۆم بكات.

خوێندنەوەی سەركردایەتی سیاسی بۆ دۆخەكەو ھەلومەرجی ناوخۆی و نێودەوڵەتی بە داخەوە لە جێی خۆی نەبوو، دروست بوونی دەوڵەتێك نەخشەی ناوچەكە دەگۆڕێت، كێ‌ بۆ ئەمە پشتیوانیت دەكات؟، ئێمە لەناو خۆماندا گفتوگۆمان دەكرد هەندێك برادەر گاڵتەی لێدەهات كە دەمانووت پشتیوانمان نییە، رەنگە ئێمە بە هاوكارییەكانی ھاوپەیمانی نێودەوڵەتی بۆ شەڕی داعش تێكەوتبین.

پێش ئەنجامدانی ریفراندۆم، عیراق وەفدی ناردە لامان و تكایان لێكردین نەیكەین، ئێران وتیان مەیكەن زیان دەكەن، ئەمریكا و وڵاتانی ئەوروپاش پێیان وتین، بەڵام هەر ریفراندۆممان ئەنجامدا.

پاش ئەنجامدانی ریفراندۆم سەركردایەتی سیاسی كورد دەبوایە ئەو پێشنیارەی سەماحەتی سیستانی جێبەجێ‌ بكردایە، كە پەرلەمانیش بڕیاریدا گفتوگۆ بكرێت و پەلەی تێدا بكرایە بۆ ئەوەی ئەو بارودۆخەی كەركوك رووینەدایە، بەداخەوە دەیڵێم ئێمە دەوڵەت بووین لەدەست خۆماندا.

خەڵك: پاش 16ی ئۆكتۆبەر پارتی گروپێكی یەكێتی بە خیانەتكار ناوبرد، پێتانوایە ئەو گروپە خیانەتكار بن؟
عەدنانی حەمەی مینا: زۆر لە  سەركردایەتی و فەرماندە سەربازییەكان  پێیان وابوو  عیراق هێرش دەكات و ڕای خۆشیا بە راشكاوی دەربڕیبوو، دەبوایە بە شێوەیەكی دیكە ئەو بارودۆخە چارەسەر بكرایە.

لە كۆبوونەوەی دوكان یەكێتی و پارتی رایانگەیاند كە دەستپێشخەرییەكەی سەرۆك كۆماریان قبوڵەو دەچنە بەغدا بۆ رێككەوتن، بەڵام بەداخەوە دوای چەند سەعات ئەو كاتەی كە بەغدا بۆ هەرێمی كورستانی دانابوو، كۆتایی هات و ئەو بارودۆخە روویدا.

سەركەوتن زۆر كەس خۆی دەكاتە خاوەنی، بەڵام شكست هەتیوە و هەمووی خۆی لێ بێبەری دەكات، من ناتوانم بڵێم كێ‌ خیانەتی كردووە، ئەمە لێكۆڵینەوە دەری دەخات، من خۆم نەمدیوە و نەمبینیوە كەسێك بڕوات و رێككەوتنێك بكات لە دژی كوردستان، ئەگەر بشزانم وایە هەركەس بیكات ئیدانەی دەكەم، ئەگەر  هەركەس كردبێتی ئەوا خیانەتە، بەڵام ناكرێت من بەڵگەم نەبێت و خەڵك تۆمەتباربكەم.

خۆزگە دادگایەكیان دابنایە و بە بەڵگەوە بیانسەلماندایە و بڵاویان بكردایەتەوە كێ‌ خیانەتی لە نیشتمانەكەی كردووە، نەك لە راگەیاندنەكانەوە یەكتر تۆمەتبار بكرایە.
دەمەوێت شتێك بڵێم، لە 25 \9 تاوەكو 16\10 ئێمە 20 رۆژمان لەبەردەمدا بوو، لە نێوان خۆماندا كۆبوونەوەمان كردوو وتمان ئەم شەڕە بكەین دەدۆڕێین.عیراق هێزێكی زۆری هێنابووە نزیك ئێمە دەیانووت ئەگەر نەكشێنەوە دێینە سەرتان، ئێمە خۆمان ئامادە نەكردبوو، هێڵەكانی بەرگریمان هەر ئەوانەبوو كە بۆ شەڕی داعش دروست كرابوو دووری كەركوك بوون، بەڵام هێزە عیراقییەكان لە قۆڵێكی ترەوە هاتن، رەنگە سەركردایەتی سیاسی پێشبینی شەڕی نەكردبێت، بەڵام لە كۆتاییدا هێرشیان كردو هاتنە ئەو ناوچانەی كە دەیانویست.

خەڵك: دەمەوێت پرسیارێكی تایبەتیت لێبكەم، ئازادی وەڵامم دەدەیتەوە یاخود نا، دەوترێت مەزهەبەكەی خۆتان لە سونەوە گۆڕیوە بۆ شیعە، ئەمە راستە؟
عەدنانی حەمەی مینا: من لەگەڵ بەشێك لە  بەرپرسەكانی هێزی بەدر هاوڕێیەتی كۆنمان هەیە، بۆ نمونە حاجی هادی عامری، ئێمە دۆست و ناسیاوی  ساڵی 80كانین و لە گەرمیان و قەرەداغ پێكەوە بووین، ھاوڕێی شۆڕش و شاخین ، بیرمە كاتی ئەنفال بوو، لە ناوچەی دەرەوار هێزی بەعس چووە سەریان، بەڵام بڕیاری كشانەوەیان نەداو 60 كەسیان لێ شەهید بوو، ئەم هەڵوێستانە هی ئەوەن شانازیان پێوە بكەی.

كێشەكانی پارو پێرار كە لە خورماتوو دروستبوون و بەداخەوە زیانی گیانی و مادی لێكەوتەوە یەكێتی  بۆ گفتوگۆ و چارەسەر منی راسپارد، بە حوكمی ئەوەی هاوڕێبووم لەگەڵیان بە دۆستایەتی كێشەكانمان چارەسەر كرد، ئەوانەی لە دوزن حاجی ئەبو رەزا و ئەبو ئەیوب، ناسراوی سەردەمی پێشمەرگایەتی یەكترین، من ئەو هاوڕێتی و پەیوەندییەی خۆم بەكار دەهێنم بۆ خزمەتی میللەتەكەم. 

رەنگە ئەمە ھۆكارێك بێت بۆ ئەوەی كە كەسێكی وەك مەلا كرێكار باسی ئەوە بكات، مەلا كرێكار خۆی بە موسوڵمان دەزانێت ئەی مەگەر پەروەردگار نافەرموگت(یا ایها الذین امنو اجتنبوا کثیرا من الظن این بعض الظن اثم ....).

من وەڵامی پرسیارەكەت بەروونی دەدەمەوە، من كوردێكی موسڵمانی سونیم، بەڵام پابەند نیم وەك كەسێكی سەلەفی بە مەسائیلی مەزھەبی وەك ئەوانە ئەركە ئاینییەكان جێ‌ ناكەم  شیعە و سونە فەرقی نییە گرنگ ئەوەیە موسڵمانە ئیسلامیش لای من بنچینەیە، چونكە ھیچ بڕوایەكم بە مەزھەبگەرایی نییە رێز ھەموو ئاین و ئاینزایەك دەگرم و ئەوەش مەسەلەیەكی تەواو شەخسییە، تۆمەت ھەڵبستنیش كارێكی ناڕەواو ناشیرینە زوڵـمە ئینسان لەسەر زانیاری بێ بنەما خەڵك تۆمەتبار بكات، خوای گەورە دەفەرموی (  ياايھا الذين ئمنوا إن جا‌وكم فاسق بنبأ فتبينوا  أن تصيبوا  قوما بجهالة فتصبحوا علي  ما فعلتم نادمين) دەشكرێ‌ ببمە شوونە (بە پێكەنینەوە) تێكەڵاوی بكەم، لەبەر خاتری لێبوردەیی ئاینی نێوان ئەو دوو مەزهەبە.

07/12/2017
2982 جار بینراوە‌‌


Developed by Avesta Group and powered by Microsoft Azure

Copyright © 2016 Xelk. all rights reserved